வாலாஜ
ராணிப்பேட்டை மாவட்டம், வாலாஜாவை அடுத்த வன்னிவேடு கிராமத்தில் இயங்கி வரும் அங்கன்வாடி மையத்தில் இன்று விஜயதசமி திருவிழாவை முன்னிட்டுச் சிறப்புப் பூஜைகளும், புதிய குழந்தைகள் சேர்க்கை நிகழ்வும் நடைபெற்றது.
இந்நிகழ்விற்கு அங்கன்வாடி மைய ஊழியர் காமாட்சி தலைமை தாங்கினார். விழாவினை முன்னிட்டு, அம்மனின் திருவுருவப் படத்திற்குச் சிறப்பு மலர் அலங்காரம் செய்யப்பட்டு, மங்கள ஆரத்தியுடன் தீபாராதனைகளும் சிறப்புப் பூஜைகளும் நடத்தப்பட்டன.
இந்நிகழ்ச்சியில் அங்கன்வாடி மையத்தைச் சேர்ந்த 25-க்கும் மேற்பட்ட சிறு குழந்தைகளும் அவர்களின் பெற்றோர்களும் ஆர்வத்துடன் கலந்து கொண்டு சிறப்பித்தனர்.
மேலும், விஜயதசமி நன்னாளை முன்னிட்டு அங்கன்வாடி மையத்தில் 3 புதிய குழந்தைகள் சேர்க்கை நடைபெற்றது. சரவணன், ருத்ரகுமார் மற்றும் ருத்ரா ஆகியோரின் பெற்றோர்கள் தங்களது குழந்தைகளை அங்கன்வாடி மையத்தில் முறைப்படி சேர்த்துத் தங்களது கற்றல் பயணத்தைத் தொடங்கி வைத்தனர்.
விழாவின் நிறைவில் கலந்து கொண்ட குழந்தைகள், பெற்றோர்கள் மற்றும் பொதுமக்கள் அனைவருக்கும் இனிப்புகள் வழங்கப்பட்டுக் கொண்டாடப்பட்டது. விஜயதசமி நாளில் நடைபெற்ற இந்நிகழ்வு வன்னிவேடு கிராம மக்களிடையே மிகுந்த மகிழ்ச்சியை ஏற்படுத்தியது.