திருவள்ளூர் மாவட்டம், ஊத்துக்கோட்டை வட்டத்திற்கு உட்பட்ட பெரியபாளையம் அடுத்த கண்ணிகைப்பேர் கிராமத்தில் அடிக்கடி ஏற்படும் மின்தடையைக் கண்டித்து, பொதுமக்கள் நேற்று இரவு சுமார் 10 மணியளவில் திடீர் சாலை மறியல் போராட்டத்தில் ஈடுபட்டனர்.
கண்ணிகைப்பேர் கிராமத்தில் அடிக்கடி மின்சாரம் தடைபடுவதால் பொதுமக்கள் பல்வேறு சிரமங்களுக்கு உள்ளாகி வருவதாகக் கூறப்படுகிறது. குறிப்பாக இரவு நேரங்களில் மின்சாரம் துண்டிக்கப்படுவதால் குழந்தைகள், முதியவர்கள், பெண்கள் உள்ளிட்ட அனைத்துத் தரப்பினரும் பாதிக்கப்படுவதாக பொதுமக்கள் வேதனை தெரிவித்தனர்.
இதனால் ஆத்திரமடைந்த கிராம மக்கள், மின்தடைப் பிரச்சினைக்கு நிரந்தரத் தீர்வு காண வலியுறுத்தி இரவு நேரத்தில் சாலையில் திரண்டு மறியல் போராட்டத்தில் ஈடுபட்டனர். இதனால் அப்பகுதியில் பரபரப்பு ஏற்பட்டது.
தகவலறிந்து சம்பவ இடத்திற்கு வந்த காவல்துறையினர், போராட்டத்தில் ஈடுபட்ட பொதுமக்களிடம் சமரசப் பேச்சுவார்த்தை நடத்தினர். மேலும், பொதுமக்களின் கோரிக்கைகள் தொடர்பாக உரிய நடவடிக்கை எடுக்கப்படும் எனப் பேசி சமாதானப்படுத்தினர்.
**பொதுமக்களின் கோரிக்கை என்ன?**
கண்ணிகைப்பேர் கிராமத்தில் தொடர்ந்து ஏற்பட்டு வரும் மின்தடைப் பிரச்சினைக்கு மின்வாரிய அதிகாரிகள் உடனடியாகத் தீர்வு காண வேண்டும். இனிவரும் காலங்களில் இதுபோன்ற மின்தடைப் பாதிப்புகள் ஏற்படாத வகையில் சீரான மின்சாரம் வழங்குவதற்கு தமிழக அரசும், சம்பந்தப்பட்ட மின்வாரிய அதிகாரிகளும் உரிய நடவடிக்கை எடுக்க வேண்டும் என்பதே அப்பகுதி மக்களின் முக்கியக் கோரிக்கையாக உள்ளது.
மக்களின் அன்றாட வாழ்க்கையைப் பாதிக்கும் இந்த மின்தடைப் பிரச்சினைக்கு அதிகாரிகள் நிரந்தரத் தீர்வு காண்பார்களா? என்பதைப் பொறுத்திருந்துதான் பார்க்க வேண்டும்.