ஆற்காடு:
ராணிப்பேட்டை மாவட்டம், ஆற்காடு வட்டம், தாமரைப்பாக்கம் கிராமத்தில் எழுந்தருளியுள்ள அருள்மிகு அங்காளபரமேஸ்வரி திருக்கோயில் மகா கும்பாபிஷேக விழா மற்றும் திருக்குட நன்னீராட்டுப் பெருவிழா இன்று வெகுவிமரிசையாக நடைபெற்றது. இக்கோயிலின் திருப்பணிகள் அனைத்தும் சிறப்பாக நிறைவடைந்ததைத் தொடர்ந்து, ஜீர்ணோத்தாரண அஷ்டபந்தன மகா கும்பாபிஷேக விழா யாகசாலை பூஜைகளுடன் தொடங்கியது. விக்னேஸ்வர பூஜை, கணபதி ஹோமம் மற்றும் பல்வேறு கால யாக பூஜைகள் வேத விற்பன்னர்கள் முழங்க பக்தி பரவசத்துடன் நடைபெற்றன. விழாவின் முக்கிய நிகழ்வான இன்று காலை, யாகசாலையில் வைத்து பூஜிக்கப்பட்ட புனித நீர் அடங்கிய கலசங்கள் மங்கள இசை முழங்க ஊர்வலமாக எடுத்துச் செல்லப்பட்டு, கோபுர கலசங்களுக்கு மகா கும்பாபிஷேகம் நடைபெற்றது. அப்போது அங்கு திரண்டிருந்த ஆயிரக்கணக்கான பக்தர்கள் பக்தி கோஷமிட்டு அம்மனை வழிபட்டனர்.
இந்த விழாவில் அதிமுக ராணிப்பேட்டை மேற்கு மாவட்ட செயலாளர் திரு. எஸ்.எம். சுகுமார் அவர்கள் கலந்துகொண்டு அம்மனைத் தரிசனம் செய்தார். விழாவிற்கு வருகை தந்த அவருக்கு விழாக்குழுவினர் மற்றும் கிராம பொதுமக்கள் சார்பில் சிறப்பான வரவேற்பு அளிக்கப்பட்டது. அதனைத் தொடர்ந்து, கோயில் திருப்பணிகளுக்காகத் தனது சொந்த நிதியிலிருந்து நிதியுதவி வழங்கிய திரு. எஸ்.எம். சுகுமார், பக்தர்களுக்கு வழங்கப்பட்ட அன்னதான நிகழ்வையும் தொடங்கி வைத்தார். இந்த விழாவிற்கான அனைத்து ஏற்பாடுகளையும் தாமரைப்பாக்கம் கிராம பொதுமக்கள், இளைஞர்கள் மற்றும் விழாக்குழுவினர் மிகச்சிறப்பாகச் செய்திருந்தனர். இவ்விழாவில் அதிமுக நிர்வாகிகள், முக்கியப் பிரமுகர்கள் மற்றும் சுற்றுவட்டார கிராமங்களைச் சேர்ந்த ஏராளமான பக்தர்கள் கலந்துகொண்டு அம்மன் அருள் பெற்றனர்.