துவரங்குறிச்சி அருகே உள்ள உசிலம்பட்டி கிராம ஊராட்சி அலுவலகத்தில், தமிழ்நாடு வேளாண்மை பல்கலைக்கழகம் (TNAU) உருவாக்கிய பயிர் ஊக்கிகள் குறித்து விவசாயிகளுக்கு விழிப்புணர்வு ஏற்படுத்தும் கூட்டம் இன்று நடைபெற்றது. இந்த கூட்டத்தை குடுமியான்மலை வேளாண் கல்லூரியைச் சேர்ந்த மாணவர்கள், குறிப்பாக மருங்காபுரி வட்டாரத்தில் வேளாண் அனுபவப் பயிற்சி (RAWE) மேற்கொண்டு வரும் ஆதிசேகர், தட்சிணாமூர்த்தி, கோகுல்ராஜ், கோகுல், கௌதம், ஜனார்தனன், கார்த்திகேயன், கத்கராஜ், குஸ்தவராஜ், மதனகுமார் ஆகிய 10 மாணவர்கள் ஒருங்கிணைத்து நடத்தினர்.
இந்த விழிப்புணர்வு கூட்டத்தில், TNAU தேங்காய் டானிக், TNAU பல்்ஸ் வொண்டர், TNAU கரும்பு பூஸ்டர், கடலை ரிச் (Groundnut Rich) மற்றும் TNAU காட்டன் ப்ளஸ் போன்ற TNAU பயிர் ஊக்கிகளின் பயன்பாடு, பயிர் வளர்ச்சியில் அவை அளிக்கும் நன்மைகள் மற்றும் சரியான தெளிப்பு முறைகள் குறித்து விவசாயிகளுக்கு விரிவாக விளக்கப்பட்டது. தேங்காய், பயறு வகைகள், கரும்பு, கடலை மற்றும் பருத்தி போன்ற பயிர்களில் இவ்வூக்கிகள் விளைச்சல் உயர்வு, மலர்ச்சி அதிகரிப்பு, பூ உதிர்வு குறைவு மற்றும் மொத்த பயிர் ஆரோக்கிய மேம்பாடு போன்ற பலன்களை வழங்குவதாக மாணவர்கள் எடுத்துரைத்தனர்.
கிராமத்தைச் சேர்ந்த விவசாயிகள் தன்னார்வமாக இந்த கூட்டத்தில் கலந்து கொண்டு, தங்கள் பயிர் சாகுபடியில் எதிர்கொள்ளும் சிக்கல்கள் குறித்து மாணவர்களுடன் கலந்துரையாடினர். இதன் மூலம் TNAU பயிர் ஊக்கிகளை நடைமுறை ரீதியாக பயன்படுத்துவதற்கான தெளிவும், அறிவியல் அடிப்படையிலான வேளாண் தொழில்நுட்பங்களை ஏற்கும் விழிப்புணர்வும் விவசாயிகளுக்கு கிடைத்தது.
இந்த கூட்டம், கல்வி மற்றும் கள அனுபவத்தை இணைக்கும் முயற்சியாகவும், விவசாயிகளின் வருமான உயர்விற்கு உதவும் புதிய தொழில்நுட்பங்களை கிராம மட்டத்தில் கொண்டு சேர்க்கும் முக்கிய நடவடிக்கையாகவும் அமைந்தது.